Ruju' of (Maulvi) Salman Nadvi

*[حضرت امیر معاویہ رضی اللہ عنہ: علمائے احناف کی نظر میں]*
.............

1-علامہ بدرالدین عینی حنفی:(م:855ھ):

"اہل سنت والجماعت کا بر حق موقف یہ ہے کہ صحابہ کرام کے اختلافات سے کنارہ کشی اختیار کیا جائے، ان سے حسن ظن رکھا جائے اور ان کے لیے عذر تلاش کیا جائے، اور یہ کہ وہ لوگ مجتہد تھے، کسی معصیت کا قصد کیا اور نہ ہی دنیا داری کا۔" (عمدۃ القاری شرح صحیح البخاری)

1-علامہ ابن ہمام حنفی(م861ھ):

"حضرت معاویہ اور حضرت علی رضی اللہ عنہما کے درمیان جو واقعات پیش آئے ان کی بنا اجتہاد پر تھی اور حضرت علی رضی اللہ عنہ کی امامت کے بارے میں حضرت امیر معاویہ رضی اللہ عنہ کی طرف سے کوئی تنازعہ نہ تھا۔" ( المسایرۃ:،ص:۳۱۴)

3-ملا علی قاری(م:1014ھ):

"حضرت امیر معاویہ رضی اللہ عنہ عادل اور صاحب فضیلت صحابہ کرام میں سے ہیں اور ان کا شمار اخیار صحابہ میں ہوتا ہے۔" ( مرقاۃ المفاتیح،ج:۱۱،ص:۲۷۲)

4-حضرت مجدد الف ثانی (م:1034ھ):

"اور قوم (یعنی علمائے اہل سنت ) کی کتابیں خطائے اجتہادی کے اقوال سے بھری ہوئی ہیں جیسا کہ امام غزالی اور قاضی ابو بکر باقلانی رحھمہما اللہ کی تصریحات سے واضح ہیں ، پس حضرت علی رضی اللہ عنہ کے ساتھ جنگ کرنے والوں کو فاسق یا گمراہ قرار دینا جائز نہیں ہے۔" (مکتوبات امام ربانی ،دفتر اول مکتوب 251)

5-علامہ شہاب الدین خفاجی(م:1069ھ):

" جو حضرت امیر معاویہ رضی اللہ عنہ پر طعن کرے وہ جہنمی کتوں میں سے ایک کتا ہے۔" ( نسیم الریاض شرح شفا للقاضی عیاض (خفاجی) ص:۴۷۵)

6-شاہ ولی اللہ محدث دہلوی(م:1176ھ):

" معلوم ہونا چاہیے کہ معاویہ بن ابی سفیان جناب نبی کریم ﷺ کے اصحاب میں سے ہیں اور فضیلت جلیلہ کے حامل اصحاب میں شامل ہیں، خبردار ! معاویہ رضی اللہ عنہ کے حق میں بدگمانی نہ کرنا اور سب و طعن کے چکر میں پڑ کر حرام فعل کا ارتکاب نہ کرنا" (ازالۃ الخفا عن خلافۃ الخلفا ،ص۱۴۶)

7-علامہ ابن عابدین(م:1252ھ):

"صحابہ کرام کے درمیان رونما ہونے والے نزاعات میں ہم سکوت اختیار کریں گے کیوں کہ یہ اجتہادی مسئلہ تھا ، اور یہی صحابہ کرام، تابعین اور ائمہ مجتہدین سمیت اہل سنت والجماعت کا موقف ہے۔" ( تنبیہ الولاۃ والحکام علی احکام شاتم خیر الانام)

8-حضرت خواجہ شمس العارفین(م:1300ھ):

" حضرت علی اور حضرت امیر معاویہ کے درمیان جو نزاع اور خصومت واقع ہوئی وہ ازروئے اجتہاد تھی، کسی عناد کی بنا پر نہیں، پس درویش کو چاہیے کہ ان حضرات صحابہ کرام کے حق میں کچھ نازیبا کلام ہرگز نہ کرے۔" (مرأۃ العاشقین در ملفوظات حضرت اعلی خواجہ شمس العارفین ، ص:۱۰۹)

9-مولانا اشرف علی تھانوی(م1362ھ):

" حضرت امیر معاویہ رضی اللہ عنہ خود صحابی ہیں اور ایک صحابی کے فرزند ہیں ، ان کے صحابی ہونے اور ان کی فضیلت اور شان میں کسی کو کلام نہیں مگر کہ وہ شخص رافضی ہو۔" (فتاوی امدادیہ ،ص۱۲۳)

10-مولانا حسین احمد مدنی (م:1957ء):

"ائمہ اہل سنت والجماعت مشاجرات صحابہ کو ‘‘خطائے اجتہادی’’ قرار دیتے ہیں". (مکتوبات شیخ الاسلام، ج:۳۔ ص:۴۳)

11مولانا امین احسن اصلاحی(م:1997ء):

" جب سیدنا عثمان غنی ،سیدنا امیر معاویہ اور اکابر بنی امیہ سے متعلق تاریخی کتابوں میں یہ پاکیزہ مواد بھی موجود ہے تو آخر اس کو نظر انداز کر کے بعض لوگوں نے صرف اس مواد کو جمع کرنے کی کوشش کیوں فرمائی جس سے ان جلیل القدر صحابیوں کی تنقیص ہو سکے، آخر یہ مطالعہ تاریخ کا کون سا انداز ہے کہ غلاظت پسند مکھی کی طرح صرف انہی گندے چھینٹوں پر آدمی کی نظر پڑے جو کسی مفتری نے ہمارے پاکیزہ خصائل اسلاف کے دامن پر اڑائے ہوں"(سیدنا معاویہ شخصیت اور کردار از حکیم محمود احمد ظفرسیالکوٹی ،ج:۲، ص:۱۰)

12-مولانا مفتی محمد تقی عثمانی:

"حضرت معاویہ ان جلیل القدر صحابہ میں سے ہیں جنہوں نے آںحضرت ﷺ کے لیے کتابت وحی کے فرائض انجام دیے ، حضرت علی کی وفات کے بعد ان کا دور حکومت تاریخ اسلام کے درخشاں زمانوں میں ہے جس میں اندرونی طور پر امن و اطمینان کا دور دورہ بھی تھا اور ملک سے باہر دشمنوں پر مسلمانوں کی دھاک بیٹھی ہوئی تھی لیکن حضرت معاویہ کے مخالفین نے ان پر اعتراضات و الزامات کا کچھ اس انداز سے انبار لگایا ہے کہ تاریخ اسلام کا یہ تابناک زمانہ سبائی پروپیگنڈے کے گردو غبار میں روپوش ہو کر رہ گیا ہے". (معاویہ اور تاریخ حقائق، ص:۵)


*******


ابراہیم بن میسرہ کہتے ہیں کہ میں نے حضرت عمر بن عبدالعزیزؒ کو کبھی نہیں دیکھا کہ کسی کو خود مارا ہو مگر ایک شخص جس نے حضرت معاویہؓ پر سبّ و شتم کی، اس کو انہوں نے خود کوڑے لگائے. ( رواہ اللالکلائی) ذکرہ ابن تیمیہ فی الصارم المسلول.


*******

سأل رجل المعافی بن عمران فقال: یا ابا مسعود ! این عمربن عبدالعزیز من معاویۃ؟ فغضب من ذلک غضبا شدیداوقال: لا یقاس باصحاب رسول اللہﷺ احد ! معاویۃ صاحبہ وصھرہ وکاتبہ وامینہ علی وحی اللہ عزوجل ،وقد قال رسول اللہﷺ: دعوا لی اصحابی واصھاری فمن سبھم فعلیہ لعنۃ اللہ والملائکۃ والناس اجمعین ،وفی روایۃ فغضب وقال: یوم من معاویۃؓ افضل من عمر عبدالعزیز عمرہ ،ثم التفت الیہ فقال: تجعل رجلاً من اصحاب محمدﷺ مثل رجل من التابعین

ایک آدمی نے حضرت معافی بن عمرانؒ سے پوچھا: حضرت معاویۃؓ کے مقابلے میں عمربن عبدالعزیز کا کیا مقام ہے ؟اس بیہودہ سوال پرحضرت معافیؒ شدید غضبناک ہوئے اور فرمایا: حضورﷺ کے(کسی ادنی سے ادنی) صحابی کی بھی بعد کا کوئی(بڑے سے بڑابھی) برابری نہیں کرسکتا،درآنحالیکہ حضرت معاویۃؓ تو آپؑ کے صحابی ہونے کے ساتھ ساتھ آپؑ کے سسرالی رشتہ دار ،اللہ کی وحی قرآن پرآپؑ کے کاتب و امین بھی ہیں اور حضورﷺ کا ارشاد گرامی ہے :میرے صحابہ اور میرے سسرالی رشتہ داروں کو میرا لحاظ کرتے ہوئے برا کہنا چھوڑ دو ،اور اگر کوئی انھیں برا کہے گا اس پر اللہ کی ،فرشتوں کی اور تمام انسانوں کی لعنت و پھٹکار ہوگی ،
اس کے بعد حضرت معافیؒ نے فرمایا: حضرت معاویۃؓ کا ایک دن عمربن عبدالعزیزؒ کی ساری زندگی سے افضل ہے ،پھر آپ سوال کرنے والے کی طرف متوجہ ہوئے اور فرمایا: کیا تو کسی تابعی کو حضورﷺ کے صحابی کے برابر لا کھڑا کرنا چاہتا ہے ۔
(مختصر تاریخ دمشق ج۲۵ص ۷۴)


*******


قال الفضل بن زیاد: سمعت ابا عبداللہ سئل عن رجل تنقص معاویۃ و عمرو بن العاص، ایقال لہ رافضی؟ فقال: انہ لم یجتر علیھما الا ولہ خبیئۃ سوء، مانتقص احد احداً من اصحاب رسول اللہﷺ الا ولہ داخلۃ سوء

فضل بن زیاد کہتے ہیں: کسی نے امام احمد بن حنبل رحمہ اللہ سے سوال کیا کہ جو آدمی حضرت معاویۃ اور عمرو بن العاص رضی اللہ عنہما کی تنقیص کرے کیا اسے رافضی کہہ سکتے ہیں؟ آپ نے فرمایا: بیشک اس(ظالم) نے ان دونوں صحابہ کی تنقیص کی جرأت صرف اس لئے کی کہ اس کے باطن میں بدی چھپی ہوئی ہے، کوئی بھی (مسلمان) کسی بھی صحابی کی تنقیص اس وقت تک نہیں کرسکتا جب تک کہ اس کے باطن میں بدی نہ گھر کرجائے
(البدایۃ والنہایۃ ج١١ ص ٤٥٠)


*******


امام مسلمؒ کے استاذ امام ابو زرعہ عراقیؒ فرماتے ہیں :

"جب تم کسی شخص کو دیکھو کہ وہ کسی صحابی کی تنقیص کررہا ہے تو سمجھ لو کہ وہ زندیق ہے اس لیے کہ ہمارے نزدیک رسول اللہﷺ حق ہیں، قراٰن حق ہے، قراٰن و سنت ہم تک پہنچانے والے یہی صحابہ کرامؓ ہیں، یہ تنقیص کرنے والے ہمارے گواہوں کو مجروح کرنا چاہتے ہیں، تاکہ کتاب و سنت کو باطل کریں ، لہذا خود ان کو مجروح کرنا زیادہ مناسب ہے، یہ زندیق ہیں."
( الکفایہ ، خطیب بغدادی ، ص ۴۹ حیدرآباد ، دکن )
ماخوذ از مقالاتِ نعمانی ، حضرت مولانا مفتی ابوالقاسم صاحب نعمانی بنارسی مہتمم دارالعلوم دیوبند.